يا ريتك يا حسنى مكنتش رئيس
ولا كنت حتى لسوزى عريس
ولا كنت خلفت اولاد ابالسة
طمعهم يجرك لقسم البوليس
ياريتك رضيت بالقدر والنصيب
وكنت يا حسنى لشعبك حبيب
لكن خنت اهلك وشعبك وناسك
وكرهك يا حسنى البعيد والقريب
زمان قلت كفنك ما فهش جيوب
طلع فيه مغارة ومليان عيوب
جيوبك خزاين فى مصر وسويسرا
مليتها بطمعك وجشعك زنوب
مشيت (ويا عزمى وفتحى وشهاب)
و(عز) اللى حط البلد فى الجراب
وسلمت دقنك وشنبك لسوزى
وربيت فى قصرك شوية كلاب
ياريتك وايه راح يفيدك ياريت؟
وظلمك معلم على كل بيت
مجاعة وفقر ومزلة وبطالة
ويوماتى تعيرنا بسكر وزيت
بليتنا ب (عاطف ومحى ونظيف )
وماتت ولايانا عشان الرغيف
وباعو المزارع وباعو المصانع
وعشنا فى زمانك سنين الخريف
يا ريتك يا حسنى قنعت بحياتك
وقنعوا ولادك وقنعت مراتك
ولا كنت شفت الفضيحة بجلاجل
وشفت المذلة فى اخر حياتك
ليست هناك تعليقات:
إرسال تعليق